Tert.am— Եվրոպայի ֆուտբոլի առաջնության եզրափակիչ խաղին ընդառաջ, Ֆրանսիայի մայրաքաղաքում կարգուկանոնի պահպանմանը հետևելու է 3500 ոստիկան և զինվորական:
Ինչպես հայտնում է BBC-ն` վկայակոչելով երկրի իշխանություններին, միայն Փարիզի «Ստադ դե Ֆրանս» մարզադաշտում, որտեղ անցկացվելու է ֆուտբոլային հանդիպումը, 1300 ոստիկան է վերահսկողություն իրականացնելու:
Բացի այդ, 1400 ոստիկան կհերթապահի Էյֆելյան աշտարակի և Ելիսեյան դաշտերի մոտակայքում, որտեղ տեղակայված է կենտրոնական ֆան-գոտին:
Եվրո-2016-ի եզրափակիչ հանդիպումը կմեկնարկի վաղը` հուլիսի 10-ի երեկոյան: Եվրոպայի չեմպիոնի տիտղոսի համար կպայքարեն Պորտուգալիայի և Ֆրանսիայի ազգային հավաքականները:
Ընդհանուր առմամբ երկու հավաքականն իրար դեմ 24 հանդիպում է անցկացրել, որից 18-ում հաղթել են Եվրո-2016-ը հյուրընկալող ֆրանսիացիները, մեկ խաղ ավարտվել է ոչ-ոքի հաշվով, 5 խաղում հաղթանակ են տարել պորտուգալացիները:
Source: Yerkir Media
Link: Եվրո-2016. եզրափակիչ հանդիպման ժամանակ անվտանգությունը կապահովեն 3500 ոստիկաններ
