ՀՀ առողջապահության նախարարությունը հորդորում է քաղաքացիներին տոնական օրերին չհիվանդանալու համար ձեռնարկել բոլոր քայլերը` սննդային թունավորումներից խուսափելու նպատակով: Ինչպես տեղեկացրին ՀՀ առողջապահության նախարարությունից, հայտարարության մեջ ասվում է.
«Սննդային թունավորումների և աղիքային վարակների կանխարգելումը սկսվում է մթերքի ձեռք բերման գործընթացից: Տոնական օրերին չհիվանդանալու համար անհրաժեշտ է.
- գնումներ կատարել խանութներից, ոչ թե անկազմակերպ վաճառքի կետերից՝ փողոցից և շուկաների հարակից տարածքից,
- գնել թարմ, չվնասված մթերք,
- աղցանները, մսային կերակրատեսակները, դոնդողը պատրաստել տանը, քիչ քանակներով՝ պահպանելով հիգիենայի կանոնները,
- գնումներ կատարելիս ուշադրություն դարձնել մթերքի պահման պայմաններին, պիտանիության ժամկետին, արտաքին տեսքին,
- նախապատվությունը տալ անվտանգության առումով որոշակի մշակում անցած գործարանային մթերքներին, օրինակ՝ պաստերացված կաթ և այլն,
- չգնել ու սննդում չօգտագործել անհայտ ծագման, չստուգված սնկեր: Սունկը գնել միայն շուկայից և խանութներից` համապատասխան իրավասու մարմնի կողմից տրված փաստաթղթի առկայության դեպքում,
- իսկ, եթե պատրաստի կերակրատեսակները ձեռք են բերվել խանութներից, ուշադրություն դարձնել պատրաստման և իրացման ժամկետներին, պահման պայմաններին, ջերմաստիճանին»:
Source: Yerkir Media
Link: ԱՆ-ն թունավորումից խուսափելու համար հորդորում է ուշադրություն դարձնել մթերքի պիտանիության ժամկետին
