Անհայտ անձինք հարձակում են իրականացրել Ղազախստանի Ակտոբե քաղաքում գտնվող զորամասի եւ զենքի խանութի վրա:
Ղազախստանի ՆԳՆ մամլո ծառայության հաղորդագրության համաձայն նրանք ներխուժել են «Պալլադա» զենքի խանութ, հարձակում են իրականացրել նաեւ «Պանտերա» զենքի խանութում եւ Ազգային գվարդիայի զորամասում:
Սպանվել են «Պալլադա» խանութի վաճառողն ու անվտանգության աշխատակիցը: Վիրավորվել են դեպքի վայր ժամանած երեք ոստիկաններ: «Պանտերա» խանութի վրա կատարած հարձակման ժամանակ սպանվել է այցելուներից մեկը, մյուսը` վիրավորվել: Ոստիկանական գործողությունների ժամանակ սպանվել են հարձակումն իրականացնողներից 4-ը, 7-ին ձերբակալել են:
Ոստիկանները շարունակում են աշխատանքը հանցագործության մյուս մասնակիցներին ձերբակալելու համար:
Նշվում է, որ զորամասի վրա հարձակում իրականացնելու համար այդ անձինք ուղեւորատար ավտոբուս են գրավել, իջեցրել են վարորդին եւ ուղեւորներին ու քշել զորամասի դարպասների ուղղությամբ:
Քաղաքում հայտարարված է ահաբեկչական վտանգի բարձրագույն սպառնալիքի ազդանշան։ Հարձակվողների ինքնության մասին մանրաասներ չեն հաղորդում։ Ենթադրվում է, որ նրանք ծայրահեղ իսլամական խմբավորումներից մեկի անդամներ են։
Source: Yerkir Media
Link: Ղազախստանում հայտարարված է ահաբեկչական վտանգի բարձրագույն սպառնալիքի ազդանշան
