ԱՄՆ պետքարտուղար Ջոն Քերին կարծում է, որ ամերիկյան կործանիչը կարող էր կրակ բացել ռուսական ռմբակոծիչների ուղղությամբ: Այս մասին հայտնում է ՌԻԱ Նովոստին:
Պետքարտուղարը ռուսական Су-24 մարտական ինքնաթիռների թռիչքն ամերիկյան Donald Cook ռազմանավի մոտով որակել է որպես «վտանգավոր և սադրիչ» միջադեպ:
«Քննադատում ենք նման պահվածքը: Դա անխոհեմ, վտանգավոր և սադրիչ քայլ է: Ըստ ռազմական գործողությունների կանոնների՝ դրանք կարող էին ոչնչացվել»,- ասել է Քերին:
Պետքարտուղարն ընդգծել է, որ ԱՄՆ-ն չի պատրաստվում տուրք տալ բաց ծովում ահաբեկումներին և հիշեցրել է, որ նմանատիպ գործողությունների վտանգավորության վերաբերյալ ԱՄՆ-ը հայտնել է իր դիրքորոշումը Ռուսաստանին:
Ավելի վաղ ԱՄՆ-ի զինված ուժերի Եվրոպական հրամանատարությունը հայտնել էր, որ ռուսական ինքնաթիռները շատ մոտ՝ 20 կմ հեռավորությամբ անցել են Բալթիկ ծովում գտնվող Donald Cook ռազմանավի մոտով, ինչը նմանվել է «կեղծ հարձակման»։
Ռուսաստանի պաշտպանության նախարարության պաշտոնական ներկայացուցիչ գեներալ-մայոր Իգոր Կոնաշենկովը, մեկնաբանելով կատարվածը, նշել է, որ ռուսական ինքնաթիռը փորձել է հետդարձ կատարել՝ հետևելով անվտանգության բոլոր կանոններին: Ըստ ռուս պաշտոնյաի՝ թռիչքը նախատեսված է եղել ամերիկյան ռազմանավից 70 կմ հեռավորության վրա:
Source: Yerkir Media
Link: Ջոն Քերի. ԱՄՆ-ն իրավունք ուներ հարվածելու ռուսական կործանիչը
