Ռիո-2016. Լեւան Բերիանիձեն պարտվեց բրոնզե մեդալի համար պայքարում
August 21, 2016
Ռիո դե Ժանեյրոյում ընթացող 31-րդ ամառային օլիմպիական խաղերում ազատ ոճի ըմբշամարտի 125 կիլոգրամ քաշային կարգում Հայաստանը ներկայացնող Լևան Բերիանիձեն պարտվեց Բելառուսի ներկայացուցիչ Իբրահիմ Սաիդովին: Երկու խաղափուլերի արդյունքում գրանցվեց 2:2 հաշիվը, սակայն առավելությունը Բելառուսը ներկայացնող մարզիկի կողմն էր:
Բերիանիձեն առաջին խաղափուլում շատ ակտիվ էր, և մրցավարները բելառուս մարզիկին երկու անգամ նախազգուշացնելուց հետո նրան 30 վայրկյան ժամանակ տվեցին միավոր վաստակելու համար: Բելառուսը ներկայացնող մարզիկը չկարողացավ միավոր վաստակել, և 1 միավոր ստացավ Լևան Բերիանիձեն: Առաջին խաղափուլն ավարտվեց Հայաստանը ներկայացնող մարզիկի նվազագույն առավելությամբ:
Երկրորդ խաղափուլում Սաիդովն ավելի ակտիվ էր, կարողացավ հնարք կատարել և երկու միավոր վաստակեց: Մնացած ժամանակահատվածում Բերիանիձն կարողացավ ընդամենը մեկ միավոր վաստակել, սակայն դա բավական չէր հաղթանակ տանելու համար:
