ՀՀ կառավարությունն անապահով ընտանիքների համար կփոխհատուցի 2016 թվականի օգոստոսի մեկից 4.32 դրամով էլեկտրաէներգիայի դիմաց ավելի վճարումով պայմանավորված ծախսերի ծավալների մեծացումը: Այդ մասին որոշման նախագիծն ընդգրկված է կառավարության հուլիսի 29-ի նիստի օրակարգում:
«Սոցիալապես անապահով ընտանիքներին աջակցելու համար, որոշման նախագծով առաջարկվում է ընտանիքի կենսամակարդակի բարձրացմանն ուղղված նպաստի չափը բարձրացնել 1000 դրամի չափով, որով հնարավորինս կհատուցվի շուրջ 112 հազար 300 ընտանիքների էլեկտրաէներգիայի դիմաց ավելի վճարումով պայմանավորված լրացուցիչ ծախսերը:
Հանրային ծառայությունները կարգավորող հանձնաժողովի տվյալներով՝ էլեկտրաէներգիայի միջին ամսական սպառումն ընտանիքների կողմից կազմում է շուրջ 202 կվտ. ձմեռային ամիսներին` 325, իսկ ամառային ամիսներին` 180 կվտ:
2016 թվականի օգոստոսի 1-ից Էլեկտրաէներգիայի սակագինը բնակչության համար 4.32 դրամով ավելի է: Ինչը նշանակում է, որ նույն 202 կվտ էլեկտրաէներգիայի համար պետք է վճարի շուրջ 1000 դրամ ավելի»,- նշված է նախագծի հիմնավորման մեջ:
Source: Yerkir Media
Link: Առաջարկվում է անապահով ընտանիքների նպաստն ավելացնել 1000 դրամով՝ որպես հոսանքի թանկացման փոխհատուցում
