Սերգեյ Լավրովը խուճապի մատնվելու պատճառներ չի տեսնում` ՀՀ պատգամավորների կողմից ԼՂՀ անկախությունը ճանաչելու նախաձեռնության առնչությամբ, քանի որ Երեւանը, միեւնույն է, վստահեցրել է, որ Ղարաբաղի կարգավիճակը չի որոշվի միակողմանիորեն: Այս մասին ասել է ՌԴ արտաքին գործերի նախարարը РИА НОВОСТИ-ի հետ զրույցում:
«Ինչ վերաբերում է այն լուրերին, որ Հայաստանում քննարկվում է ԼՂՀ անկախությունը ճանաչելու հարցը. դա չէ՞ որ ոչ թե Հայաստանն է քննարկում, այլ՝ 2 պատգամավորի առաջարկ է: Եւ ՀՀ կառավարությունը, հանդարտեցնելով կրքերը, բացատրել է, որ այդ օրինագծի նախագծին դեռ պետք է եզրակացություն տան: Ես տագնապի ազդանշան չէի հնչեցնի եւ խուճապի չէի մատնվի»,- ասել է Լավրովը:
Նախարարը նշել է, որ հիմա կարեւորը նոր զոհերից խուսափելն է եւ հրադադարի ցանկացած խախտում կանխելն ու դրա համար իրական քայլեր ձեռնարկելը:
«Մոսկվան բարդ, բայց հնարավոր է համարում ԼՂ հակամարտության խաղաղ կարգավորման գաղափարի փաստաթղթային ձեւակերպումը»,- ասել է Լավրովը:
Ինչպես արդեն նշել ենք, Հայաստանի կողմից Լեռնային Ղարաբաղի անկախության հնարավոր ճանաչումը Բաքվում բավական նյարդային արձագանքի է արժանացել:
Source: Yerkir Media
Link: Լավրովը խուճապի մատնվելու պատճառներ չի տեսնում ԼՂ-ի անկախությունը ճանաչելու հարցում
