Երեկ վարչապետ Նիկոլ Փաշինյանը հայտարարել էր, որ ուժեր կան, որոնք ձեւացնում են, թե հեղափոխության առաջամարտիկներ են, բայց խորհրդարանում, ռեստորաններում, «քուչեքում» բանակցությունների մեջ են ՀՀԿ-ի հետ, որ դուք մեզ աջակցեք քաղաքապետի ընտրություններում ձեր ընտրակեղծարար մեխանիզմներով, մենք ձեզ աջակցենք, որ ԱԺ արտահերթ ընտրություններ չլինեն: Այսօր լրագրողների հետ զրույցում Aravot.am-ը ՀՅԴ խմբակցության ղեկավար Արմեն Ռուստամյանին հարցրեց՝ ըստ ձեզ ո՞ւմ նկատի ուներ Նիկոլ Փաշինյանը եւ արդյոք դուք նման բանակցությունների մեջ եք ՀՀԿ-ականների հետ: Նա պատասխանեց. «Նախ, պետք է դուրս գանք ի վերջո այս խորհրդավորության դաշտից, կասկածանքի մթնոլորտից: Եթե բան կա ասելու՝ ասեք կոնկրետ անուններով, այլ ոչ թե ես պիտի մեկնաբանեմ պարոն Փաշինյանի ասածը կամ իր մտքերը»:
Ռուստամյանն ասաց, որ իր տպավորությամբ դա քարոզչական հնարք էր, որ հասարակության ուշադրությունը շեղվի ՔՊ-ի թեկնածուի անհաջող մեկնարկից:
Ըստ Ռուստամյանի, այն հայտարարությունները, որ արեց Հայկ Մարությանը՝ սեւ ու սպիտակի բաժանումը, մեր դեմ խաղ չկա եւ այլն, քննադատվեց ու Փաշինյանն ուզում էր ինչ-որ բեկում մտցնել այդ անհաջող մեկնարկից. «Ի վերջո, խնդիրը նրա մասին է, որ ոչ թե մենք քաղաքապետ ենք ընտրում, ավագանի ենք ընտրում, այլ այս քվեարկությունը ավելի շատ խորհրդարանի լուծարման քվեարկություն է: Մենք հարցն այդ դաշտ չէինք տեղափոխի»:
Լրագրողի հարցին՝ ռեստորաններում, քուչեքում, ինչպես պարոն Փաշինյանն է ասում, հանդիպումներ ՀՀԿ-ականների հետ ունենո՞ւմ եք՝ Ռուստամյանը պատասխանեց. «Նախ պետք է հասկանալ, թե որտեղից պարոն վարչապետին այդ տեղեկատվությունը, տեսել են, խոսակցություն են արձանագրել, ձայնագրել են՝ թող հրապարակեն, մենք էլ իմանանք: Եթե տեսաձայնագրվել է խոսակցությունը, դա էլ հարց է…դա տեղափոխում է այլ հարց: Թող հրապարակեն ու ասեն, մենք որեւէ ձեւով դրա հետ կապված չենք: Կասկածանքը լավ վահան է, բայց վատ սուր է, կասկածանքով կարելի է պաշտպանվել, բայց չի կարելի հարձակվել»:
Հարցին՝ դուք բացառո՞ւմ եք, որ վարչապետը ՀՅԴ-ին նկատի ունի՝ Արմեն Ռուստամյանը պատասխանեց՝ միանշանակ, տրամաբանություն դրա մեջ չկա:
Մանրամասները՝ տեսանյութում։
Source: Yerkir Media
Link: «Կասկածանքը լավ վահան է, բայց վատ սուր․․․»․ Արմեն Ռուստամյան
