Կարապետյանը, մեկնաբանելով իր՝ ՀՀԿ-ին անդամակցելու որոշումը, ասաց, որ վարչապետի պաշտոնը ստանձնելով` ինքը դարձել է մասնակիցը փոխելու և փոխվելու նոր գործընթացի` վերցնելով պատասխանատվության իր բաժին բեռը:
Կարապետյանը պարզաբանեց, որ վարչապետի պաշտոնին իրեն հրավիրել է Հանրապետության նախագահ և ՀՀԿ նախագահ Սերժ Սարգսյանը: Հետեւաբար, ըստ նրա, յուրաքանչյուր կառավարություն պետք է ունենա քաղաքական հենարան, և մեր կառավարությունը եղել է առաջին հերթին ՀՀԿ կառավարությունը: Վարչապետի խոսքով` եթե նույնիսկ հաշվի չառնենք իր նշած այս կետերը, ոմանց մոտ կարող է լինել տեսական հարցադրում՝ ինչո՞ւ չեն ստեղծել մեկ այլ կուսակցություն, որը կլիներ իր քաղաքական հենարանը.
«Ուղղակի դա արդարացված չէր լինի: Ունենալով Արցախի հիմնահարց և երկրի անվտանգությանն ուղղված սպառնալիքներ՝ մենք պետք է խուսափենք հնարավոր բոլոր դեստաբիլիզացիոն գործընթացներից ու զարգացումներից»:
Վրաչապետը վստահեցրեց, որ փոփոխությունների իրականացման քաղաքական հենարան կարող է լինել ՀՀԿ-ն, քանի որ իրեն հոգեհարազատ է կուսակցության պահպանողական գաղափարախոսությունը, և այնտեղ իր համար ընդունելի բազմաթիվ մարդիկ կան: Այս նոր իրավիճակում իր ընկերներից և համախոհներից շատերը ցանկանում են միանալ գործընթացին, բայց պարտադիր չէ, որ կառավարության անդամներն անդամակցեն ՀՀԿ-ին։
Կարապետյանն ասում է՝ դա յուրաքանչյուրի գիտակցական և գաղափարական որոշման հարցն է։ Ըստ վարչապետի, ինչպես մյուս կուսակցությունները, ՀՀԿ-ն եւս ոչ միշտ է եղել արդյունավետ, բայց, ըստ նրա, ՀՀԿ-ն այն կուսակցությունն է, որ գիտակցելով երկրի անվտանգության և զարգացման համար իր պատասխանատվությունը, որոշում է կայացրել փոխվել և ունի իր մեջ այդ ներուժը։
Source: Yerkir Media
Link: Կարեն Կարապետյանը ներկայացրեց ՀՀԿ-ին անդամակցելու պատճառները