Սուդանի Նուբա լեռներում «Ավրորա» մրցանակի դափնեկիր բժիշկ Թոմ Քաթինային փոխարինող հայ բժիշկներ Արմինե Բարխուդարյանը, Հայկ Հովհաննիսյանը եւ Գեւորգ Ոսկանյանը այսօր ժամանել են Երեւան: Հարազատներն ու ընկերները նրանց դիմավորել են անչափ կարոտած եւ մեծ հպարտությամբ: Հայ բժիշկները մայիսի 9-ից մեկնել են Սուդան: Մոտ մեկ շաբաթ է տեւել այնտեղ հասնելը: Ողջ շրջանին սպասարկող «Գթության մայր» հիվանդանոցի միակ վիրաբույժ Թոմ Քաթինան անձամբ դիմավորել է նրանց, ծանոթացրել հիվանդանոցին եւ հիվանդների խնամքին:
Տարբեր բարդության վիրահատություններ անելով եւ ծնունդներ ընդունելով՝ հայ բժիշկները մոտ մեկ ամիս պատվով կատարել են Թոմ Քաթինայի առաքելությունը: Պատասխանելով լրագրողների հարցերին՝ բժիշկները միաձայն նշել են, որ հարկ եղած դեպքում նորից կգնան եւ օգնություն կցուցաբերեն բոլոր կարիքավորներին: Ըստ նրանց՝ մարդասիրական աշխատանքը մաքրազերծում է մարդուն եւ սովորեցնում նվիրվել:
Բժիշկները նաեւ խոստացել են, որ Սուդանում իրենց վերապրածի, տպավորությունների մասին առաջիկայում առավել մանրամասն կպատմեն:
