Շուտով մի խումբ սիրիահայ գործարարներ իրենց հասցեն կունենան նաեւ «Երեւան» տոնավաճառում: Այդտեղ նրանց համար մատչելի պայմաններով տաղավարներ են տրամադրել:
Մի քանի օրից Վանին կտեղափոխի ապրանքներն ու գործի կանցնի: Մոտավորապես հինգ տարի առաջ պատերազմի պատճառով ամուսնու ու երկու երեխաների հետ ինքն էլ թողեց Հալեպում ամեն ինչ ու որոշեց թեկուզ զրոյից, բայց ապահով պայմաններում ամեն ինչ նորից սկսել հայրենիքում: Սկզբում դժվար էր, բայց հիմա այդ փորձությունը մասամբ հաղթահարել է:
Հագուստ, կոշկեղեն, համեմունքներ, ձեռագործ աշխատանք․․․ Վանիից բացի վաճառքով կզբաղվեն չորս տասնյակից ավելի սիրիահայ սկսնակ գործարարներ: «Երեւան» տոնավաճառի տնօրինության եւ Սիրիահայ գործարարների միության նախաձեռնությամբ տոնավաճառի մի հատվածը սիրիահայերինն է՝ 6 ամիս անվճար, հետո արդեն մատչելի գներով կշարունակեն վարձակալել:
Վանին ասում է՝ գործը սկսելու համար ամեն ինչ պատրաստ է, ընդամենը մի քանի ազատ տաղավար է մնացել, երբ դրանց տերերին էլ գտնեն, կսկսեն վաճառքը: Միակ բանը, որ դեռ չեն որոշել, շուկայի անունն է: Երկու տարբերակ կա՝ Հալեպի շուկա կամ Նոր Հալեպ, որը կընտրեն՝ կորոշի իրենց ընդհանուր խորհուրդը:
Մանրամասները՝ տեսանյութում։
Source: Yerkir Media
Link: Մատչելի պայմաններով տաղավարներ՝ սիրիահայերի համար
