Շարմազանով. Ցեղասպանության ճանաչումը պատասխան էր Վաշինգտոնում թուրքերի լկտի պահվածքին
May 20, 2017
Հայաստանի Ազգային ժողովի փոխնախագահ Էդուարդ Շարմազանովը խորհրդարանի ամբիոնից շնորհակալություն հայտնեց ԱՄՆ Տեխաս նահանգի Ներկայացուցիչների պալատին Հայոց ցեղասպանությունը ճանաչելու և դատապարտելու համար:
«Տեխասն ԱՄՆ-ի 46-րդ նահանգն է, որ ճանաչում և դատապարտում է Հայոց ցեղասպանությունը: Ես կարծում եմ, որ մենք պետք է ողջունենք այս քայլը և շնորհակալություն հայտնենք մեր ամերիկացի գործընկերներին այս քայլի համար»,-Ազգային ժողովի նիստի ընթացքում ասաց Շարմազանովը:
Նա ընդգծեց, որ Տեխասի Ներկայացուցիչների պալատի այդ քայլը շատ հստակ պատասխան էր Թուրքիայի ժխտողական քաղաքականությանը և օրերս Վաշինգտոնում թուրքերի լկտի պահվածքին:
Ինչպես ավելի վաղ հայտնել էինք, Վաշինգտոնում մայիսի 16-ին Թուրքիայի նախագահ Ռեջեփ Թայիփ Էրդողանի այցի դեմ բողոքի ակցիա են անցկացրել հայերը, հույները, ասորիները, քրդերը: ԱՄՆ-ում Թուրքիայի դեսպանի կեցավայրի մոտ խաղաղ ցուցարարների վրա հարձակվել են Էրդողանի անվտանգության աշխատակիցներն ու դաժան ծեծի ենթարկել նրանց:
