Թալիշի դիրքերի համար Սասուն Մկրտչյանը կյանքը զոհեց
February 9, 2017
Մկրտչյանների համեստ ընտանիքի ամենաթանկ ձեռքբերումը՝ ավտոմեքենան այնքան էլ լավ վիճակում չէ, բայց դրանից հրաժարվել 28-ամյա հետախույզ Սասուն Մկրտչյանի ծնողները չեն պատրաստվում: Միակ որդու արդար քրտինքով վաստակածն է: Նվիրել է հորը, որ հենց դժվարանա քայլել մեքենայով տեղաշարժվի: Առողջությունը չէր ներում, բայց մի քանի ամիս առաջ Ֆահրադ Մկրտչյանը ուժ է հավաքել, ղեկին նստել ու հասել Թալիշ՝ այնտեղ, որտեղ որդին վերջին կռիվն է տվել:
2016-ի ապրիլին Թալիշը պահելու համար Սասունը հենց այսպես պիտի հակառակորդի մեծաթիվ ջոկատների դեմ կանգներ` վիրավոր ընկերներին դուրս հաներ հակառակորդի կրակի տակից ու շտապեր նաեւ կորցրած դիրքերը վերադարձնել:
Սասունցի պապերից ֆիդայինների ու կորցրած պատմական հայրենիքը վերադարձնելու պատմությունները լսելով էր Սասունը մեծացել: Օրինակելի, պարտաճանաչ աշակերտ էր, այսպիսին են նրան հիշում նաեւ իր սիրելի դպրոցում: Այստեղ հերոսի պես է վերադարձել ՝ օրինակ դառնալով շատերի համար:
