Պաշտոնական այցով Վրաստանում գտնվող Հայաստանի Հանրապետության վարչապետ Նիկոլ Փաշինյանը Ախալքալաքի մշակույթի կենտրոնում հանդիպեց հայ համայնքի ներկայացուցիչների հետ: ՀՀ վարչապետին ուղեկցում էր Վրաստանի արտաքին գործերի նախարար Միխեիլ Ջանելիձեն:
«Հզոր Հայաստան՝ նշանակում է հզոր Վրաստան եւ հակառակը»,- ասել է Վրաստանի արտաքին գործերի նախարար Միխեիլ Ջանելիձեն:
Վրացի նախարարը նշել է, որ շատ բան են արել, բայց դեռ էլի անելիք կա: «Հայաստանն այլ միության անդամ է, Վրաստանն՝ այլ: Ինտեգրացիոն այդ կապերը պետք է օգտագործել, որպեսզի գործակցությունն էլ ավելի խորացնենք»,- ընդգծել է նախախարը:
Երկրները միասին բազմաթիվ ծրագրեր ունեն, ամեն ինչ անելու են, որպեսզի դրանից օգտվեն քաղաքացիները: Նինոծմինդայի ճանապարհները նորգելու համար էլ մրցույթ է հայտարարվել:
Նիկոլ Փաշինյանը ողջունեց ներկաներին և նշեց, որ Հայաստանը վճռական է դարավոր եղբայրական հարաբերությունները բոլորովին նոր մակարդակի բարձրացնելու հարցում:
«Ես Վրաստան պաշտոնական այցով եկել եմ հենց Վրաստան պետությանը, վրաց ժողովրդին ուղղված սիրո և համերաշխության ուղերձով և չափազանց երջանիկ եմ՝ տեսնելով, որ տեղ է հասել և այդ ուղերձը, այն ունի կոնկրետ արտահայտում և համարում եմ, որ այսօրվա դահլիճի մթնոլորտը հենց այդ ուղերձի ամենակարևոր արտահայտումն է»,- նշեց Նիկոլ Փաշինյանը:
Source: Yerkir Media
Link: «Հզոր Հայաստան՝ նշանակում է հզոր Վրաստան, եւ հակառակը»․ Միխեիլ Ջանելիձե
