Իննից տասնչորս տարեկան 25 երգչից բաղկացած Վիեննայի տղաների երգչախումբը երևանյան համերգի առաջին կատարումը նվիրեց Շառլ Ազնավուրին:
Երգչախումբը երաժշտասերներին զարմացրեց` ներկայացնելով Կոմիտասի, Հայդնի, Մենդելսոնի, Շուբերտի, Շտրաուսի և այլ մեծանուն կոմպոզիտորների ստեղծագործություններ: «Երևանյան հեռանկարներ» միջազգային երաժշտական փառատոնի շրջանակում անցկացվող համերգային ծրագիրը տեղի ունեցավ հոկտեմբերի 4-ին «Արամ Խաչատրյան» համերգասրահում:
«Երգչախումբը տարիներ առաջ հյուրընկալվել է Հայաստանում: Մենք շատ ուրախ ենք լինել այստեղ, ծանոթանալ ձեր մշակույթին և ելույթ ունենալ Հայաստանի երաժշտասերների առաջ», նշեց երգչախմբի դիրիժոր Օլիվեր Շտեքը:
Նա ասաց, որ երգչախմբի անդամները աշխարհի տարբեր երկրներից են: «Մենք տղաներին ընտրում ենք լսումների միջոցով: Երբեմն վարպետության դասեր ենք անցկացնում այլ երկրներում և հենց այդ ժամանակ, ստուգելով երգիչների ձայնային տվյալները, առաջարկում ենք նրանց ընդգրկվել երգչախմբում»,- հավելեց Շտեքը:
Համերգին դահլիճը լեփ-լեցուն էր. արվեստասերներից շատերը, տեղերի սահմանափակության պատճառով, նստել էին աստիճաններին: Հանդիսատեսը բուռն ծափողջյուններով էր ընդունում փոքրիկ տաղանդների ելույթները:
Source: Yerkir Media
Link: Վիեննայի տղաների երգչախումբը երևանյան բեմում Կոմիտաս հնչեցրեց
