ՀՅ Դաշնակցության քաղաքապետի թեկնածու Միքայել Մանուկյանն «Խնկո Ապոր» անվան գրադարանում տեղակայված ընտրատեղամասում կատարեց իր ընտրությունը:
Մանուկյանի խոսքով՝ քարոզարշավի ընթացքը բավարար էր, քանի որ մի փոքր ավելի շատ քաղաքականացվեց ընտրությունների ընթացքը:
«Վարչապետի մասնակցությունը քարոզարշավին ավելի քաղաքական բնույթ հաղորդեց և մի փոքր շեղեց ընտրությունների ընթացքը: Վարչապետը խնդիր դրեց, որ, ընտրելով իր թիմի առաջադրած թեկնածուին, իրեն վստահության քվե կհայտնեն, ինչը, կարծում եմ, վարչական լծակի օգտագործում էր»,-ասաց Մանուկյանը:
Ըստ նրա՝ քաղաքացին այսօր բարձր ինքնագիտակցություն ունի: Մանուկյանը հույս ունի, որ յուրաքանչյուրը խղճի մտոք է քվեարկելու. «Շատ լավ մթնոլորտ է տիրում ընտրատեղամասերում, ոչ մի խնդիր դեռևս չի եղել: Ամեն ինչ իր բնականոն հունով գնում է»:
Մանուկյանը պատրաստակամություն հայտնեց, որ, անկախ ընտրությունների արդյունքից, թե ով կդառնա քաղաքապետ՝ պատրաստ է համագործակցել այդ ուժի հետ:
Source: Yerkir Media
Link: Քաղաքապետի ՀՅԴ թեկնածու Միքայել Մանուկյանը մասնակցեց քվեարկությանը
