Արվեստագետը նշել է, որ Սարոյանն իրեն ուղեկցել է ամբողջ կյանքում եւ ուրախ է, որ ներկայացման պրեմիերան հենց Հայաստանում է կայանալու: Ներկայացվել է նաեւ Ստաս Նամինի մոր՝ երաժշտագետ, հրապարակախոս Նամի Միկոյանի «Գրիգոր Շինարար» գրքի շնորհանդեսը: Այն նվիրված է 1937-1953 թթ. ՀԽՍՀ կոմկուսի առաջին քարտուղար Գրիգոր Հարությունյանին:
Մշակույթի փոխնախարար Ներսես Տեր-Վարդանյանն էլ ընդգծել է, որ սա ոչ միայն հայ-ռուսական համագործակցության հերթական դրսեւորումն է, այլեւ մեր ազգի տաղանդավոր գործիչներից մեկին ավելի լավ ճանաչելու հրաշալի առիթ:
Ի դեպ, Ստաս Նամինը՝ Անաստաս Միկոյան կրտսերը, Խորհրդային Միության պետական ու քաղաքական գործիչ Անաստաս Միկոյանի թոռն է:
«Հայկական մշակույթն ամենակարեւորն է, որ ընդհանրապես գոյություն ունի: Հայաստանի գենետիկ կոդը հարյուր հազարավոր տարիներ գոյություն ունի հենց այդ զարմանահրաշ մշակույթի շնորհիվ, եւ ես շատ եմ ուզում, որ այն շարունակվի»,- նշեց Ստաս Նամինը:
«Մեծ ուրախություն է ինձ համար, որ հայերենով լույս է տեսել իմ «Գրիգոր Շինարար» գիրքը: Այն ինձ որդեգրած մարդու՝ իմ հոր, իմ դաստիարակի մասին է: Կուզեի, որ նրա ով լինելու եւ նրա արարքների մասին շատերն իմանային»,- հավելեց Նամի Միկոյանը:
Source: Yerkir Media
Link: Երաժիշտ, նկարիչ Ստաս Նամինի 65-ամյակը նշվում է նաեւ Հայաստանում
