Օբամայի հրաժեշտի նամակը. «Ձեր շնորհիվ ես ավելի լավը դարձա»

ԱՄՆ-ի նախագահ Բարաք Օբաման հրաժեշտի նամակ է գրել Միացյալ Նահանգների քաղաքացիներին: Այն զետեղված է Սպիտակ տան կայքում:

Տեքստը սկսվում է «Իմ բարեկամ ամերիկացիներ» բառերով: Այնուհետեւ Օբաման հակիրճ հիշեցնում է իր հաջորդին նամակ թողնելու գոյություն ունեցող ավանդույթի մասին եւ հայտնում, որ նախ ցանկանում է շնորհակալություն հայտնել ամերիկացիներին՝ իրեն ցույց տված պատվի համար:

«Այն ամենն, ինչ ես սովորեցի պաշտոնավարության ընթացքում, սովորեցի ձեզնից,- գրում է Օբաման:- Ձեր շնորհիվ ես ավելի լավը դարձա, լավ ե′ւ որպես նախագահ, ե′ւ որպես մարդ»:

Վերջում Օբաման ամերիկացիներին հորդորում է, անկախ քաղաքական պատկանելությունից, լինել այն երկրի ազնիվ քաղաքացիները, որտեղ իրենք ապրում են: «Եվ երբ ձեզ թվա, թե առաջընթացը դանդաղում է, հիշե′ք, Ամերիկան մեկ մարդու նախագիծ չէ: Կա մի բառ՝ ամենահզորը մեր ժողովրդավարության մեջ՝ «մենք» բառը: Մենք ժողովուրդն ենք: Մենք կհաղթահարենք ամեն ինչ: Այո՛, մենք կարող ենք», գրել է Օբաման:

Source: Yerkir Media
Link: Օբամայի հրաժեշտի նամակը. «Ձեր շնորհիվ ես ավելի լավը դարձա»