Շիրակի մարզպետարանում օգոստոսի 18-ին տեղի ունեցավ Տնտեսական զարգացման և ներդրումների նախարարության շուկայի վերահսկողության տեսչական մարմնի (ՇՎՏՄ) հանդիպումը ոչ պարենային ապրանքների շուկայում գործող տնտեսվարողների հետ։
ՇՎՏՄ երկրորդ եռամսյակի ստուգումները, որոնք իրականացվել են եւ օգոստոսի 10-ի դրությամբ ավարտվել են 72 տնտեսվարողների մոտ, ցույց են տալիս, որ հիմնական խնդիրները վերաբերում են մակնշման պահանջների անհամապատասխանությանը, հավաստագրի (սերտիֆիկատ) բացակայությանը, ԱԳԼՃԿ-ներում` ճնշման գերազանցմանը, վառելիքի որակի անհամապատասխանությանը։
ՇՎՏՄ մասնագետները ներկայացրին գործողությունների այն շղթան, որը թույլ կտա տնտեսվարողներին շուկայում աշխատել օրինականության դաշտում՝ առանց խնդիրների։
Հանդիպման վերջում տեսչական մարմնի ղեկավար Լեւոն Խալիկյանը հիշեցրեց, որ մանրածախ առեւտրով զբաղվողներն իրենք են պատասխանատու ապրանքի որակի հավաստագրի (սերտիֆիկատի) առկայության համար ու պետք է ներմուծողից պահանջեն այն, ու այդ դեպքում շատ խնդիրներ դաշտում կլուծվեն։
