Մեծ Բրիտանիայի Ոստիկանությունը օգոստոսի 12-ին ձերբակալել է 25-ամյա չինացի ուսանողին, ով, կոշիկի մեջ թաքցնելով դանակը, փորձել է սողոսկել Բուքինգեմյան պալատ ու սպանել Էլիզաբեթ II թագուհուն: Այս մասին հայտնում է The Daily Mail-ը:
Խան Չժան անունով այս երիտասարդը սովորում է Շեֆֆիլդ բրիտանական համալսարանում: Երբ նրան ձերբակալել են, նա հավաստիացրել է, որ մտադրվել էր սպանել թագուհուն: Աղբյուրը նշում է, որ չի բացառվում՝ տղան, հնարավոր է, ունի հոգեկան խնդիրներ:
Թերթը գրում է, որ սա նման 4-րդ դեպքն է այս տարվա մայիսից սկսած: Անցած շաբաթ արբած տղամարդը ցատկել է պատնեշի վրայով, 15 րոպե շրջել պալատի տարածքում, ապա նրան հայտնաբերել են պալատական պահակներն ու բռնել:
Իսկ ահա Էլիզաբեթ II-ի ծննդյան տարեդարձից մի քանի օր առաջ պալատ էր թափանցել 3 դանակներով զինված մի երկրպագու՝ Ջոն Բոլտոն անունով:
Մայիսին 41-ամյա տղամարդը, ով դատապարտված է եղել սպանության համար, մտել է պալատի տարածք, մոտեցել պահակազորին՝ ճշտելու՝ տանն է թագուհին, թե ոչ:
Source: Yerkir Media
Link: Չինացի ուսանողը փորձել է սպանել թագուհի Էլիզաբեթ II-ին
