Սեպտեմբերի 4-ին կայացավ Արագածոտնի մարզխորհրդի նիստը: Մարզպետ Աշոտ Սիմոնյանը ներկայացրեց օրակարգը՝ նշելով, որ այնտեղ ներառված են հարցեր, որոնց մարզի ղեկավարությունն առնչվում է ամենօրյա աշխատանքային գործունեության ժամանակ, եւ դրանք առաջնահերթ լուծման անհրաժեշտություն ունեն:
Մարզի համայնքների սեփական եկամուտների հավաքագրման ցուցանիշերի մասին զեկուցեց մարզպետի տեղակալ Գառնիկ Աթանեսյանը: Նա նշեց, որ եթե մարզի մեծ եւ խոշորացված համայնքներում հավաքագրման տեմպերը բավականին բարձր են, ապա փոքր համայնքներում շատ հակասական պատկեր է: Խնդիրը կարգավորելու համար մարզպետի հետ քննարկումների արդյունքում որոշում է կայացվել մարզի որոշ համայնքներում արտահերթ իրավաբանական եւ մասնագիտական հսկողություն սահմանել: Արդյունքում՝ օգոստոսի 31-ի դրությամբ գրանցվել է շուրջ 50 տոկոս հավաքագրում, որը գերազանցում է նախորդ տարվա նույն ժամանակահատվածի հավաքագրմանը:
Զեկուցվեցին նաեւ մարզում հողօգտագործման ընդհանուր վիճակի, համայնքներին սուբվենցիաներ տրամադրելու գործընթացի, աղքատության կարիքավորության աստիճանը որոշելու համար պահանջվող փաստաթղթերի եւ կարգի մասին հարցերը, ինչպես նաեւ աղբահանության գործընթացի մասին:
Մարզպետը հստակ ներկայացրեց համայնքների տնտեսական եւ սոցիալական ենթակառուցվածքների զարգացմանն ուղղված սուբվենցիաների տրամադրման ծրագրին ակտիվ մասնակցության անհրաժեշտությունը: Սրանք այն խնդիրներն են, որոնք համայնքներին զարգանալու հնարավորություն են ընձեռում, եւ որոնց համայնքապետերը առավել սրտացավորեն եւ պատասխանատվությամբ պետք է մոտենան:
Source: Yerkir Media
Link: Արագածոտնում մարզխորհրդի նիստ է կայացել
