Երևանի ավագանու արտահերթ ընտրությունները տեղի կունենան սեպտեմբերի 23-ին
August 18, 2018
Երևանի ավագանու արտահերթ ընտրությունները կանցկացվեն 2018թ.-ի սեպտեմբերի 23-ին։ Այս մասին օգոստոսի 18-ին Կենտրոնական ընտրական հանձնաժողովի արտահերթ նիստում հայտարարեց ԿԸՀ քարտուղար Արմեն Սմբատյանը։
Երևանի ավագանու արտահերթ ընտրությունների քարոզարշավը տեղի կունենա սեպտեմբերի 10-21-ը։ ԿԸՀ որոշմամբ՝ ընտրություններին մասնակցող կուսակցությունները պետք է իրենց առաջադրման հայտը ներկայացնեն մինչև օգոստոսի 29-ը։ Հանձնաժողովը հայտերը կհաստատի մինչև սեպտեմբերի 3-ը, իսկ ընտրությունների արդյունքները կամփոփի սեպտեմբերի 30-ին։
Հանձնաժողովի նիստում հայտարարվեց, որ ավագանու ընտրությունների՝ 5 քմ մակերեսը գերազանցող գովազդային վահանակներում քարոզչական պաստառ տեղադրելու համար կուսակցությունների և կուսակցությունների դաշինքների հայտերն ընտրական հանձնաժողովն ընդունելու է մինչև օգոստոսի 29-ը։
