Մինաս Ավետիսյանի, Հովհաննես Այվազովսկու, Մարտիրոս Սարյանի, Գառզուի, Արշիլ Գորկու, Ռոբերտ Էլիբեկյանի, Լևոն Թութունջյանի, Երվանդ Քոչարի և այլ հայ մեծանուն նկարիչների ստեղծագործությունները ներկայացվեցին մեկ հարթակում: «Ընտրանի» խորագրով ցուցահանդեսը բացվեց սեպտեմբերի 5-ին Կոմիտասի թանգարան-ինստիտուտում: Ցուցանմուշները բացառապես մասնավոր հավաքածուներից են:
«Ցուցահանդեսը մեծ բիզնես ձեռնարկի իրականացման առաջին քայլն է, որի նպատակը հայ կերպարվեստն աշխարհին ճանաչելի դարձնելն է: Հեռանկարում նախատեսում ենք ոչ միայն ցուցահանդեսներ բացել, այլև հրատարակել կատալոգներ և կազմակերպել աճուրդներ: Առաջին աճուրդը կկայանա այս տարվա դեկտեմբերին»,-«Արմենպրես»—ի հաղորդմամբ, նշեց «Հայ կոլեկցիոներներ»-ի ակումբի հիմնադիր-տնօրեն Աննա Գրիգորյանը:
Նա շեշտեց, որ մի շարք կտավներ առաջին անգամ են ցուցադրվում: Օրինակ՝ Դմիտրի Նալբանդյանի «Հայկական հովիտ» ստեղծագործությունը, Սարգիս Դիրանյանի «Հարեմ», Գևորգ Բաշինջաղյանի «Դարիալի կիրճը գիշերով» և այլ գործեր: «Մեկ շաբաթ առաջ Հայաստան է բերվել Երվանդ Քոչարի 1959 թվականին նկարված «Պառկած կինը» աշխատանքը, որը երկար տարիներ ցուցադրվել է Փարիզում»,- ասաց Գրիգորյանը:
Միջոցառումը կազմակերպել էին «Բարձր արվեստ» կերպարվեստի կենտրոնը և «Հայ կոլեկցիոներների ակումբ»-ը: Ցուցահանդեսը բաց կլինի մինչը սեպտեմբերի 25-ը:
Ցուցահանդեսի բացման հանդիսավոր արարողությանը ներկա էր ՀՀ վարչապետ Կարեն Կարապետյանը:
Source: Yerkir Media
Link: «Ընտրանի» խորագրով ցուցահանդեսին ներկայացվեցին հայ արվեստի լավագույն նմուշները
