Ադրբեջանի շուրջ 900 քաղաքացի Սիրիայի եւ Իրաքի ապօրինի զինված կազմավորումների եւ ահաբեկչական կազմակերպությունների անդամներ են եղել՝ տարածաշրջանում զինված հակամարտության սկսվելուց ի վեր: Այս մասին «Ինտերֆաքս-Ադրբեջան»-ին հայտնել է Ադրբեջանի պետական անվտանգության ծառայության աղբյուրը, հաղորդում է haqqin.az-ը:
«Մեր տեղեկություններով՝ Մերձավոր Արեւելքում (Սիրիայում եւ Իրաքում) ռազմական գործողությունների սկսվելուց ի վեր, շուրջ 900 ադրբեջանցիներ միացել են ապօրինի զինված կազմավորումների եւ ահաբեկչական կազմակերպությունների: Մենք նաեւ տեղեկություններ ունենք, որ նրանցից շատերը սպանվել են հակաահաբեկչական գործողությունների ժամանակ»,- ասել է գործակալության աղբյուրը:
Ավելի վաղ Ադրբեջանի պետական անվտանգության ծառայության պետի տեղակալ, գեներալ-մայոր Իլգար Մուսաեւը «Ինտերֆաքս-Ադրբեջան»-ին հայտնել էր, որ ահաբեկչական կազմակերպություններին միացած 82 մարդ Ադրբեջան վերադառնալուց հետո պատասխանատվության է ենթարկվել: Եվս 151 ադրբեջանցի ահաբեկչական կազմակերպությունների կողմից ռազմական գործողություններին մասնակցելու համար զրկվել է Ադրբեջանի քաղաքացիությունից` համաձայն «Քաղաքացիության մասին» օրենքի:
Source: Yerkir Media
Link: «Իսլամական պետության» շարքերում Ադրբեջանի 900 քաղաքացի է կռվել
