Վարչապետ Կարեն Կարապետյանի գլխավորած պատվիրակությունը մեկնել է Շվեյցարիայի Դավոս քաղաք` մասնակցելու Համաշխարհային 48-րդ ամենամյա տնտեսական ֆորումին: Համաժողովն այս տարի կանցկացվի հունվարի 23-26-ը: Կարապետյանը հանդիպումներ կունենա ինչպես երկկողմ, այնպես էլ բազմակողմ ձեւաչափում: Բացի այդ, վարչապետը մասնակցելու է նաեւ ընդհանուր` այսպես ասած գլոբալ օրակարգի վերաբերյալ պատվիրակությունների ղեկավարների քննարկումների ու հավաքների, մասնավորապես` ֆորումի ամենաբարձր մակարդակի նիստին` Համաշխարհային տնտեսական առաջնորդների ոչ պաշտոնական հավաքին: Ֆորումին ամեն տարի բարձր մակարդակով մասնակցում են պատվիրակություններ աշխարհի ավելի քան 100 երկրից: Նրանց թվում կլինեն նաեւ Մեծ Բրիտանիայի վարչապետ Թերեզա Մեյի եւ ԱՄՆ-ի նախագահ Դոնալդ Թրամփի գլխավորած պատվիրակությունները: Թրամփն էլ կամփոփի համաժողովի արդյունքները եզրափակիչ ելույթով:
Հիշեցնենք, որ դավոսյան ֆորումին մեկ անգամ` 2009թ., մասնակցել է Սերժ Սարգսյանի գլխավորած պատվիրակությունը:
Source: Yerkir Media
Link: Կարեն Կարապետյանի գլխավորած պատվիրակությունը մեկնել է Շվեյցարիա