Աշխարհի լավագույն կլինիկաների մասնագետները հավաքվել են Հայաստանում՝ մասնակցելու «Հեմոֆիլիայի բուժօգնություն» երկօրյա սեմինարին, որի ընթացքում մասնագետները կուսումնասիրեն արյան մակարդման հիվանդների վարման հայաստանյան փորձը, կկիսվեն իրենց փորձառությամբ:
Սեմինարը կազմակերպել են Առողջապահության նախարարության Յոլյանի անվան արյունաբանական կենտրոնը, Հեմոֆոլիայի միջազգային ֆեդերացիան ու Հեմոֆիլիայի հայկական ասոցացիան: Կազմակերպիչները հույս ունեն, որ սեմինարը կօգնի բարելավել արյան համակարգի հիվանդությունների բուժումը Հայաստանում:
«Հեմոֆիլիան Ա-ն բնորոշվում է մակարդման 8-րդ գործոնի, Հեմոֆիլիա Բ-ն 9-րդ գործոնի բացակայությամբ, եւ եթե մենք պրոֆիլակտիկ ձեւով կարողանանք այդ հիվանդներին ներարկել մակարդման այդ գործոնները ամսական 2-3 անգամ, ապա այդ հիվանդները կարող են ապրել սովորական կյանքով եւ չեն ունենա որեւէ արյունահոսության դեպք», -ասում է Ռ. Յոլյանի անվան արյունաբանական կենտրոնի տնօրեն Սմբատ Դաղբաշյանը:
Պրոֆեսորի խոսքով, թեեւ մակարդման հիվանդության բուժումը պետական պատվերի շրջանակում է տեղի ունենում, բայց, ցավոք, Հայաստանում հիվանդության բուժման համար անհրաժեշտ քանակի դեղորայք չկա. այն բավականացնում է միայն սուր դեպքերի ժամանակ: Մեկ հիվանդի բուժումն ինչ-որ կերպ կազմակերպելու համար նվազագույնը 50-60 հազար դոլար է անհրաժեշտ, իսկ Սմբատ Դաղբաշյանը ձգտում է հասնել նրան, որ Հայաստանում հիվանդները բարձրակարգ բուժում ստանան: Հայաստան ժամանած Հեմոֆոլիայի միջազգային ֆեդերացիայի ներկայացուցիչները խոստացել են եւս մեկ միլիոն միավոր հեմոֆիլիայի ֆակտորներ տրամադրել մեր երկրին:
«Դա բավականաին մեծ օգնություն է, որովհետեւ ֆակտորները շատ թանկարժեք են եւ ես հուսով եմ, որ այդ դեղորայքի Հայաստան մտնելուն զուգընթաց մենք յուրաքանչյուր տարի նոր հայտնաբերված երեխաների մոտ կիրականացնենք պրոֆիլակտիկ բուժօգնություն, որպեսզի նրանք խուսափեն արյունահեղության դեպքերից»,- նշում է տնօրեն Դաղբաշյանը:
Հեմոֆիլիայի համաշխարհային ֆեդերացիայի տարածաշրջանային ծրագրերի ղեկավար բժիշկ Ասադ Հաֆառի խոսքով, հեմոֆիլիան ազգային պատկանելություն չունի եւ հանդիպում է 10 հազար մարդուց մեկի մոտ: Ըստ այս հաշվարկի, Հայաստանում պետք է որ շուրջ 300 նման հիվանդ լինի, սակայն ներկայումս մեր երկրում կա հեմոֆիլիայով ախտորոշված 234 հիվանդ, որից 54-ը երեխաներ են: Բժիշկ Ասադը շեշտեց, որ այժմ գերխնդիր պետք է լինի մնացած հիվանդներին գտնելն ու բուժելը: Ինչ վերաբերում է սեմինարի անցկացմանը, այն կարծիքների փոխանակման լավագույն հարթակ է:
«Հայաստանը վերջին տարիներին հեմոֆլիայի ոլորտում արձանագրել է զգալի առաջընթաց եւ դա կարող է սեմինարի մասնակից մյուս երկրների մասնակիցներին քաջալերել անցնել այն ճանապարհը, ինչեւ Հայաստանը եւ իրենց երկրներում նույնպես բարելավել իրավիճակը»,- ասում է Հեմոֆիլիայի համաշխարհային ֆեդերացիայի տարածաշրջանային ծրագրերի ղեկավար բժիշկ Ասադ Հաֆառը:
Իսկ առաջիկայում հայ բժշիկները սպասում են նորամուտի։ Շտուվ իր դռները կբացի ժամանակակից նոր սարքերով հագեցած հեմոֆիլիայի նորակառույց կենտրոնը, որն եզակի է տարածաշրջանում։
Source: Yerkir Media
Link:
ՀՀ-ում կա հեմոֆիլիայով ախտորոշված 234 հիվանդ, որից 54-ը երեխաներ են
