Ղազախստանի եւ Ռուսաստանի նախագահները խնդրահարույց են համարում Հավաքական Անվտանգության Պայմանագրի Կազմակերպության գլխավոր քարտուղար Յուրի Խաչատուրովի շուրջ ստեղծված իրավիճակը:
Երեկ կայացած երկկողմ հանդիպման ընթացքում Ղազախստանի նախագահ Նուրսուլթան Նազարբաեւն ընդգծել է, որ ռուս-ղազախական հարաբերությունների ու գործակցության հետ կապված բազմաթիվ քննարկման ենթակա հարցեր կան, որոնցից առաջնային կարեւորություն այժմ ունի հենց ՀԱՊԿ գլխավոր քարտուղարի շուրջ ստեղծված խնդիրը:
Ռուսաստանի նախագահ Վլադիմիր Պուտինն էլ շեշտել է, որ ՀԱՊԿ-ի եւ Եվրասիական Տնտեսական Միության շրջանակներում համագործակցության լայն օրակարգ ու մեծ ծրագրեր կան, բայց առկա են նաեւ խնդրահարույց հարցեր, որոնցից մեկը ՀԱՊԿ-ում ստեղծված իրավիճակն է:
Հիշեցնենք, որ Յուրի Խաչատուրովին «մարտի 1-ի» գործով մեղադրանք առաջադրելուց հետո մեր հանրապետության արտգործնախարարության մամուլի քարտուղար Տիգրան Բալայանը հայտարարել էր, որ Հայաստանը ՀԱՊԿ անդամ պետություններին առաջարկել է սկսել գլխավոր քարտուղարի փոխարինման գործընթաց: Ի պատասխան Ռուսաստանի արտգործնախարարությունից արձագանքել էին, թե խնդրի առնչությամբ անհրաժեշտ պարզաբանումեր հայկական կողմին տրվել են Սերգեյ Լավրովի եւ Զոհրապ Մնացականյանի միջեւ կայացած հեռախոսազրուցի ընթացքում, եւ որ հենց պաշտոնական Երեւանը պետք է սկսի Խաչատուրովին հետ կանչելու գործընթացը:
Source: Yerkir Media
Link: Ղազախստանի եւ Ռուսաստանի նախագահները խնդրահարույց են համարում Յուրի Խաչատուրովի շուրջ ստեղծված իրավիճակը
