«Լայոնռոկ» թայֆունը խախտել է երկաթուղային եւ օդային տրանսպորտի աշխատանքը Ճապոնիայի Հոկայդո հյուսիսային կղզում: Այդ մասին օգոստոսի 30-ին հայտնել են NHK եւ Kyodo գործակալությունները:
Նրանց տվյալներով՝ չեղյալ է հայտարարվել շուրջ 110 ավիաչվերթ, կանգնեցվել է 20 արագընթաց գնացքների երթեւեկությունը, որոնք կղզին կապում են Ճապոնիայի մնացած մասի հետ:
Թայֆունը, ինչպես նշում է Ճապոնիայի օդերեւութաբանական գործակալությունը, մոլեգնել է նաեւ Ճապոնիայի գլխավոր կղզու հյուսիսում՝ անցնելով դրա վրայով եւ շարժվելով ռուսական Հեռավոր Արեւելքի ուղղությամբ:
«Լայոնռոկը», որը մեկ շաբաթ առաջ ձեւավորվել է Խաղաղ օվկիանոսում, ուղեկցվում է սաստիկ քամիներով, ծովային փոթորկով եւ անձրեւներով: Քամու արագությունը հասնում է վայրկյանում 35 մետրի՝ մինչեւ 50 մետր պոռթկումներով, հաղորդել է ՌԻԱ Նովոստի գործակալությունը:
Source: Yerkir Media
Link: Ճապոնիայում թայֆունը խախտել է երկաթուղային եւ օդային տրանսպորտի աշխատանքը
